महामार्गावर खुलेआम दारूच्या पार्ट्या

उत्पादन शुल्क विभाग, पोलिसांचे दुर्लक्ष

। पनवेल । विशेष प्रतिनिधी ।

मुंब्रा-पनवेल महामार्गावर खुलेआम दारूच्या पार्ट्या रंगत आहेत. महामार्गालगत असलेल्या मद्य विक्री दुकानातून मद्य खरेदी करून त्याच ठिकाणी मद्यपान केले जात आहे. स्थानिक पोलीस आणि उत्पादन शुल्क विभाग मात्र याकडे दुर्लक्ष करत असल्याने या प्रकारात दिवसेंदिवस वाढ होत आहे.

महामार्गांवर होणार्‍या अपघातांमध्ये अतिमद्यपान करून वाहन चालवल्यामुळे होणार्‍या अपघातांची संख्या मोठी आहे. हे अपघात रोखण्यासाठी महामार्गालगत असलेली मद्य विक्री करणारी दुकाने बंद करण्याचे आदेश न्यायालयाने काही वर्षांपूर्वी दिले होते. कालांतराने न्यायालयाने हे आदेश मागे घेतल्याने महामार्गालगत असणारी बंद झालेली दुकाने पुन्हा सुरु झाली आहेत. यामध्ये मुंब्रा-पनवेल महामार्गावरील काही दुकानांचादेखील समावेश असून, पनवेल पालिका हद्दीतील खुटारी गाव येथे असलेले मद्यविक्रीचे दुकान, नावडे वसाहत येथील मद्यविक्रीचे दुकान तसेच कळंबोली वसाहत येथे असलेल्या मद्य विक्री करणार्‍या दुकानाचादेखील यामध्ये समावेश आहे. या ठिकाणी सुरु असलेल्या मद्य विक्री दुकानाबाहेर मद्यपींकडून खुलेआम मद्यपान केले जात आहे. मद्यपींकडून सुरु असलेल्या या प्रकाराकडे गंभीरतेने पाहून दारू पार्ट्याचे सुरु असलेले हे कार्यक्रम रोखण्यासाठी प्रशासनाने पावले उचलावीत, अशी मागणी सामान्य नागरिक करत आहेत.

पालिकेच्या अतिक्रमण विभागाचे दुर्लक्ष
मद्यपींची सोय म्हणून मद्य विक्री दुकानाबाहेर खाद्य पदार्थ विक्री, थंड पेय विक्री आणि पाणी विक्री करणारे स्टॉल लावण्यात आले आहेत. मोठ्या संख्येने सुरु असलेल्या या स्टॉलवर कारवाई करण्यास पालिकेचे अतिक्रमण विभागाचे कर्मचारीदेखील टाळाटाळ करताना दिसत आहेत.

राज्य उत्पादन शुल्क विभागाच्या नियमांचे उल्लंघन
राज्य उत्पादन शुल्क विभागाच्या नियमानुसार मद्य विक्री दुकानाच्या आवारात मद्यपान करण्यास बंदी आहे. ग्राहकाने दुकानातून विकत घेतलेले मद्य इतरत्र जाऊन पिणे अपेक्षित आहे. मात्र, पनवेल पालिका हद्दीतील खुटारी, नावडे वसाहत आणि कळंबोली येथील दुकानाबाहेर या नियमांचे उल्लंघन केले जात आहे.

महामार्गालगत असलेल्या मद्य विक्री दुकानाबाहेर सुरु असलेल्या मद्य पार्ट्या बंद होणे अपेक्षित आहे. या ठिकाणी मद्यपान करणार्‍यांकडून छेडछाडीसारखे प्रकार होण्याची शक्यता असल्याने प्रशासनाने त्वरित याविरोधात पावले उचलणे आवश्यक आहे.

नितीन काळे,
सहाय्यक, राजसाहेब ठाकरे वैद्यकीय मदत कक्ष