रायगडच्या खेळाडूंची राज्यस्तरीय स्पर्धेसाठी निवड

| अलिबाग | प्रतिनिधी |

रायगड जिल्हा बुद्धिबळ संघटनेच्या मान्यतेने आणि लायन सुयोग पेंडसे (डिस्ट्रिक्ट युथ कोऑर्डीनेटर, लायन डिस्ट्रिक्ट 3231 -4) यांच्या संयुक्त विद्यमाने पनवेल येथील गोखले सभागृहात जिल्हास्तरीय निवड चाचणी स्पर्धा उत्साहात पार पडली. या स्पर्धेतून 7 आणि 9 वर्षांखालील गटातील गुणवान खेळाडूंची राज्यस्तरीय बुद्धिबळ स्पर्धेसाठी रायगड जिल्ह्याचे प्रतिनिधी म्हणून निवड करण्यात आली आहे.

या स्पर्धेत महाड, पनवेल, अलिबाग, पेण, कर्जत आणि नवी मुंबई अशा विविध भागांतून एकूण 146 स्पर्धकांनी आपला बुद्धीचा कस लावला. निवड चाचणीसोबतच 11, 13, 15 आणि 17 वर्षांखालील वयोगटांच्या स्पर्धांचेही आयोजन करण्यात आले होते. स्पर्धा अत्यंत खेळीमेळीच्या आणि चुरशीच्या वातावरणात पार पडल्या.
कार्यक्रमाचे उद्घाटन रायगड जिल्हा बुद्धिबळ संघटनेचे अध्यक्ष विलास म्हात्रे यांच्या हस्ते झाले. यावेळी त्यांनी संघटनेचा प्रवास आणि बुद्धिबळ खेळाच्या प्रसारासाठी सुरू असलेल्या प्रयत्नांचा आढावा घेतला. जिल्हा माहिती अधिकारी मनोज सानप यांनी संघटनेच्या कार्यकारिणी मंडळाशी चर्चा करुन खेळाडूंना मोलाचे मार्गदर्शन केले. सुयोग पेंडसे यांनी स्पर्धेसाठी दिलेल्या सहकार्याबद्दल आभार मानले.

यशस्वी स्पर्धकांना एकूण 42 चषक आणि 40 पदके प्रदान करण्यात आली. निवड झालेल्या खेळाडूंमध्ये 7 वर्षांखालील गटात आद्वीक वर्मा, विहान वैद्य (मुले) आणि मनस्वी आडे, सानवी निमावत (मुली) यांचा समावेश आहे, जे पुणे येथे होणाऱ्या राज्यस्तरीय स्पर्धेत जिल्ह्याचे प्रतिनिधित्व करतील. तसेच 9 वर्षांखालील गटात आद्वीक वर्मा, अंश दधीच (मुले) आणि लावण्या सिंग, अस्मी राजपूत (मुली) यांची छत्रपती संभाजीनगर येथे 2 व 3 जून रोजी होणाऱ्या राज्यस्तरीय स्पर्धेसाठी निवड झाली आहे. यासह ओजस पाटील, कुणाल खारतोडे, हृतवी म्हात्रे, ओवी समेल, लन जॅकोब, अनिष्का कोळी यांसारख्या खेळाडूंनीही आपापल्या गटात चमकदार कामगिरी करत पहिल्या पाच क्रमांकांत स्थान पटकावले.

स्पर्धेच्या यशस्वी नियोजनासाठी चंद्रशेखर पाटील, आविष्कार मरभळ, श्रेयस पाटील, सुशील गुरव, अथर्व दातार आणि सिद्धी वानखेडे यांनी काम पाहिले. बक्षीस वितरण समारंभाला सचिव सुशील गुरव, आल्हाद पाटील, सी.एन. पाटील, पनवेल चेस असोसिएशनचे उपाध्यक्ष समीर परांजपे आणि अंकित जोशी यांसारखे मान्यवर उपस्थित होते.