ओबीसी जागांसाठी कार्यक्रमाचे आयोजन
। अलिबाग । विशेष प्रतिनिधी ।
जिल्ह्यातील नऊ नगरपरिषदांच्या सार्वत्रिक निवडणूकांच्या तयारीला जिल्हा प्रशासन लागले असतानाच आता न्यायालयाच्या निकालानुसार नागरिकांच्या मागासवर्ग प्रवर्गासाठी (ओबीसी) आरक्षण व सोडत नव्याने काढण्यात येणार आहे त्यानुसार सुधारित आरक्षण व सोडतीचा कार्यक्रम गुरुवार दि. 28 जुलै रोजी जाहिर करण्यात आला आहे. यापूर्वी जाहीर करण्यात आलेल्या अनुसूचित जमाती व त्यामधी महिलांसाठी निश्चित केलेल्या आरक्षणात कोणताही बदल होणार नसून सर्वसाधारण महिलांचे सोडतीद्वारे काढलेले आरक्षण रद्द करण्यात आले आहे.
राज्य निवडणूक आयोगाच्या आदेशान्वये नमूद केलेल्या नगरपरिषदांच्या सार्वत्रिक निवडणूकांसाठी आरक्षित जागा निश्चित करण्यासाठी जिल्ह्यातील नऊ नगरपरिषदांमध्ये आरक्षण व सोडतीचा कार्यक्रम जाहीर करण्यात आला आहे. त्यानुषंगाने जाहीर करण्यात आलेला कार्यक्रम पुढील प्रमाणे सदस्य पदांच्या आरक्षणाच्या सोडतीकरीता जिल्हाधिकारी आणि नगरपरिषदेच्या वेबसाईटवर नोटीस प्रसिद्ध करणे मंगळवार दि. 26 जुलै 2022, आरक्षणाची अधिसुचना हरकती तसेच सुचना मागविण्याकरीता वृत्तपत्रात तसेच स्थानिक पातळीवर वेबसाईटवर प्रसिद्ध करणे 29 जुलै ते 1 ऑगस्ट दरम्यान. सदस्यपदांच्या आरक्षणास मान्यता देणे 4 ऑगस्ट, सदस्यपदांच्या आरक्षणाची अधिसुचना वृत्तपत्रात तसेच स्थानिक पातळीवर वेबसाईटवर प्रसिद्ध करणे 5 ऑगस्ट. जिल्ह्यातील खोपोली, अलिबाग, महाड, माथेरान, मुरूड जंजिरा, पेण, रोहा, श्रीवर्धन व उरण या नगरपरिषदांच्या आरक्षण व सोडतीवरील प्राप्त होणार्या हरकती व सूचना स्विकारण्यासाठी संबंधित नगरपरिषदेच्या मुख्याधिकार्यांची नियुक्ती करण्यात आली आहे.
प्रत्येक नगरपरिषदांमध्ये गुरुवार दि. 28 जुलै रोजी सायंकाळी 4 वाजल्यापासून, आरक्षण सोडतीचे तसेच आरक्षण व सोडतीच्या अनुषंगाने हरकती व सूचना संबंधीत नगरपरिषद कार्यालयात स्विकारण्यात येणार आहेत. तसेच आरक्षण व सोडतीच्या अनुषंगाने हरकती व सूचना शुक्रवार, दि.29 जूलै 2022 ते सोमवार, दि.1 ऑगस्ट 2022 पर्यंत, सकाळी 10.00 ते सायंकाळी 06.00 वाजेपर्यंत स्विकारण्यात येणार असल्याची माहिती जिल्हाधिकारी डॉ.महेंद्र कल्याणकर यांनी दिली आहे.