बांगलादेशीय नागरीकांना सुनावली सजा

। पनवेल । वार्ताहर ।
पनवेल परिसरात बेकायदेशीररित्या वास्तव्य करणार्‍या तीघा बांगलादेशीयांविरोधात पनवेल मा.न्यायालयाने सजा सुनावली आहे. यामुळे अशा प्रकारे आपल्या चाळीत किंवा घरात नियमाचे उल्लंघन करून बांगलादेशीयांना वास्तव्य करून देणार्‍यांचे धाबे दणाणले आहेत.
पनवेल तालुका पोलीस ठाण्याच्या हद्दीतील नेरेपाडा येथील म्हात्रे चाळ या ठिकाणी अनधिकृतरित्या तीन घुसखोर बांगलादेशीय नागरिक राहत असल्याची माहिती पनवेल तालुका पोलीस ठाण्याचे वपोनि रवींद्र दौंडकर व त्यांच्या पथकाला मिळाली होती. त्यानुसार सदर ठिकाणी छापा टाकून लाखी गुलाम मालिक, मासुद राणा इंदुशेख, वजमुना मासुद राणा शेख व सोबत लहान मुलगी नाजिया यांना ताब्यात घेवून त्यांच्या अधिक चौकशीमध्ये त्यांनी कोणतीही वैध प्रवासी कागदपत्राशिवाय अवैध मार्गाने भारत-बांगला सिमेवरुन लपत छपत भारतात प्रवेश करून पनवेल परिसरात अनधिकृतपणे वास्तव्य केल्याचे निष्पन्न झाल्याचे त्यांच्या विरुद्ध तालुका पोलीस ठाण्यात गुन्हा दाखल करण्यात आला होता. सदर खटल्याची मा.न्यायालयाने सुनावणी सुरू केली. सुनावणी अंती मा.जेएमएफसी पनवेल न्यायालय इंदलकर यांनी तीन्ही आरोपींना सदर खटल्यात दोष सिद्ध ठरवून त्यांना 2 वर्षे सक्तमजूरी व 1 हजार रुपये दंड व दंड न भरल्यास 3 महिने साधी कैद अशी सजा सुनावली आहे.
सदर आरोपींना सजा होण्यासाठी वरिष्ठ पोलीस निरीक्षक रवींद्र दौंडकर, सहाय्यक पोलीस निरीक्षक नितीन पगार, कोर्ट पैरवी पोलीस हवालदार अजित म्हात्रे व पथकाने विशेष मेहनत घेतली आहे.