लव्ह स्टोरीत तिसऱ्याचीही एन्ट्री; अखेर रचला भयंकर कट

| जुन्नर | वृत्तसंस्था |

जुन्नरमधून एक धक्कादायक घटना समोर आली आहे. अनैतिक संबंधला अडथळा ठरत असल्याच्या कारणावरून गाडी अंगावर घालून तरुणाचा खून केला गेला आहे. या प्रकरणी नारायणगाव पोलिसांनी सीसीटीव्हीच्या आधारे एका महिलेसह दोन जणांना शुक्रवारी (दि.१२) रात्री अटक केली आहे. याबाबत नारायणगाव पोलिसांनी दिलेल्या माहितीनुसार, शुक्रवारी दुपारी जुन्नर तालुक्यातील नारायणगाव येथे पुणे-नाशिक महामार्गालगत असलेल्या अयोध्या हॉटेलसमोर ही घटना घडली. आरोपीवर खुनाचा गुन्हा दाखल केला आहे.

याबाबत मृत साबीर मोहंमद शफी आणि जेबा इरफान फकीर हे दोघेही एकमेकांचे शेजारी होते. साबीर जेबावर एकतर्फी प्रेम करायचा. ते जुन्नर येथे राहतात. जेबा ही कांदळी वसाहतीत एका कंपनीत कामास होती. नोकरीनिमित्त ती रोज जुन्नर ते कांदळी ये जा करत असे. अभिजित सोनवणे हा तालुक्यात शेतजमीन मोजणीचे काम करतो. प्रवासादरम्यान जेबा आणि अभिजित यांची ओळख झाली होती. या माध्यमातून त्यांच्यात प्रेमसंबंध निर्माण झाले. ही माहिती साबीर मोहंमद शफी ब्यापारी याला होती. यावरून साबीर आणि अभिजित यांच्यात वाद निर्माण झाला होता. रमजान सणासाठी गुरुवारी (दि.११) अभिजित हा जेबा हिच्या घरी आला होता. यावेळी तू येथे का आलास? असा जाब साबीर याने अभिजित याला विचारला. यावरून पुन्हा त्यांच्यात वाद झाला.

शुक्रवारी सकाळी जेबा कांदळी येथे जाण्यासाठी जुन्नर येथून बसने निघाली होती. दरम्यान साबीर याने तिचा पाठलाग सुरु केला. याबाबतची माहिती जेबा हिने मोबाईल कॉल करून अभिजित याला दिली होती. शुक्रवारी दुपारी दोन वाजण्याच्या सुमारास साबीर हा पुणे नाशिक महामार्ग लगत असलेल्या आयोध्या हॉटेल येथे उभा होता. दरम्यान अभिजित याने साबीर याच्या अंगावर कार घालून त्याला चिरडलं. या घटनेत साबीर याचा जागीच मृत्यू झाला. शुक्रवारी सायंकाळी मुस्लीम समाजाचा मोठा जनमुदाय नारायणगाव येथील पोलीस ठाण्यात जमा झाला. आरोपीला अटक करण्याची मागणी समाजातील कार्यकर्त्यांनी केली. पोलिसांनी पिंपळवंडी येथून आरोपीला ताब्यात घेतलं. त्यानंतर महिलेला सुद्धा ताब्यात घेतलं.

आरोपींनी गुन्ह्याची कबुली दिली असून संगनमताने हा गुन्हा केला असल्याचे प्राथमिक तपासात निष्पन्न झालं. पोलिसांनी अभिजित सोनवणे आणि सहआरोपी महिला जेबा इरफान फकीर या दोघांनाही अटक करून खूनाचा गुन्हा दाखल केला आहे. पुढील तपास सहायक पोलीस निरक्षक महादेव शेलार करत आहेत.