अलिबागमधील मतमोजणीसाठी यंत्रणा सज्ज

| रायगड | जिल्हा प्रतिनिधी |

अलिबाग नगरपरिषदेच्या निवडणुकीच्या मतदानानंतर मतमोजणी कधी होणार ?, याकडे लक्ष लागून राहिले होते. अखेर दिर्घ प्रतिक्षेनंतर रविवारी (दि.21) सकाळी दहा वाजल्यापासून मतमोजणीला सुरुवात होणार आहे. मतमोजणीच्या ठिकाणापासून शंभर मीटर परिसरात कोणालाही विनाकारण फिरकू दिले जाणार नाही. दीडशेहून अधिक अधिकारी व कर्मचाऱ्यांची नियुक्ती केली असून पोलिसांचा कडेकोट बंदोबस्त राहणार आहे. अलिबागमधील मतमोजणीसाठी यंत्रणा सज्ज असल्याची माहिती प्रशासनाकडून देण्यात आली आहे.

अलिबाग नगरपरिषदेच्या नगरसेवक पदाच्या 20 जागांपैकी प्रभाग दोनमधील नगरसेवक पदाचे उमेदवार प्रशांत नाईक यांची बिनविरोध निवड झाल्याने नगरसेवकपदाच्या 19 आणि नगराध्यक्षपदाच्या एक अशा 20 जागांसाठी प्रत्यक्ष मतदान झाले. एकूण 44 उमेदवार निवडणूकीच्या रिंगणात होते. नगराध्यक्षपदासाठी दोन व नगरसेवक पदासाठी 42 उमेदवारांचा समावेश आहे. यामध्ये महाविकास आघाडीतील शेकाप व काँग्रेसचे थेट नगराध्यक्षपदासाठी अक्षया प्रशांत नाईक,नगरसेवकपदासाठी प्रभाग एकमधून संतोष मधूकर गुरव, संध्या शैलेश पालवणकर. प्रभाग दोनमधून सुषमा नित्यानंद पाटील. प्रभाग तीनमधून साक्षी गौतम पाटील, आनंद अशोक पाटील, प्रभाग चारमधून रेश्मा मनोहर थळे, महेश वसंत शिंदे. प्रभाग पाचमधून निवेदिता राजेंद्र वाघमारे, समिर मधूकर ठाकूर. प्रभाग सहामधून ऋषीकेश रमेश माळी, अश्वीनी ठोसर. प्रभाग सातमधून ॲड. मानसी संतोष म्हात्रे, अभय म्हामुणकर. प्रभाग आठमधून ॲड. निलम किशोर हजारे, अनिल चोपडा. प्रभाग नऊमधून योजना प्रदिप पाटील, सागर शिवनाथ भगत. प्रभाग दहामधून शैला शेषनाथ भगत, वृषाली महेश भगत हे उमेदवार आहेत.

मतमोजणी प्रक्रीया लांबणीवर गेल्याने अलिबागमधील जनरल अरुणकुमार वैद्य हायस्कूलमध्ये स्ट्राँग रुम तयार करण्यात आले. सीसीटीव्ही कॅमेरांसह शस्त्रधारी पोलिसांचा कडेकोट बंदोबस्त याठिकाणी ठेवण्यात आला होता. मतमोजणीची प्रतिक्षा लागून राहिली होती. अखेर ही प्रतिक्षा संपली असून रविवारी (दि. 21) सकाळी दहा वाजल्यापासून मतमोजणीला सुरुवात होणार आहे. मतमोजणीसाठी दहा टेबल असणार आहे. प्रभाग सहामध्ये एकच फेरी होणार असून इतर प्रभागात दोन फेऱ्या होणार आहेत. मतमोजणीसाठी साधारणतः दीडशे अधिकारी व कर्मचारी यांची नियुक्ती केली आहे. मतमोजणीच्यावेळी पोलिसांचा पहारा असणार आहे. पत्रकार पक्षासह उमेदवार व त्यांच्या प्रतिनिधींसाठी बसण्यासाठी व्यवस्था केली असल्याची माहिती नगरपरिषद प्रशासनाकडून देण्यात आली आहे.