खांदा कॉलनीतील मैदानांवर फुटबॉलप्रेमींची धूम

फिफा विश्वचषकाची क्रेझ

| पनवेल | प्रतिनिधी |

जगभरात सुरू असलेल्या फिफा विश्वचषक फुटबॉल स्पर्धेची क्रेझ सध्या खांदा कॉलनी परिसरातही पाहायला मिळत आहे. फुटबॉलप्रेमी एकही सामना चुकवू इच्छित नसताना, स्थानिक युवक मैदानावर उतरून आपल्या खेळकौशल्याची झलक दाखवत आहेत. खांदा वसाहतीतील विविध मैदानांवर दररोज फुटबॉल सामन्यांचा थरार रंगत असून युवकांचा उत्साह ओसंडून वाहत आहे.

जून महिन्याचे पंधरा दिवस उलटून गेले तरी वरुणराजाने अद्याप हजेरी लावलेली नाही. कडक उन्हाची तमा न बाळगता खेळाडू मैदानावर घाम गाळत सराव आणि सामने खेळत आहेत. फुटबॉल हा केवळ खेळ नसून शिस्त, संघभावना आणि जिद्दीचे प्रतीक असल्याचे या युवकांच्या खेळातून दिसत आहे.

आंतरराष्ट्रीय स्तरावर लिओनेल मेसी, ख्रिस्तियानो रोनाल्डो यांसारखे दिग्गज खेळाडू आपल्या देशासाठी सर्वोच्च मानाचा चषक जिंकण्यासाठी सर्वोत्तम कामगिरी करत असताना, त्यांच्यापासून प्रेरणा घेत खांदा कॉलनीतील युवा खेळाडूही मोठी स्वप्ने पाहत आहेत.