लाखोंचे अमली पदार्थ जप्त
। पुणे । प्रतिनिधी ।
गुन्हे शाखेच्या अमली पदार्थ विरोधी पथकाने वेगवेगळ्या भागात कारवाई करुन 25 लाख 51 हजार रुपये किंमतीचे अमली पदार्थ जप्त केले. त्यामध्ये मॅफेड्रॉन आणि गांजाचा समावेश आहे. याप्रकरणी तिघांना अटक करण्यात आली असून त्यांच्याविरुद्ध मार्केट यार्ड आणि विमानतळ पोलीस ठाण्यात गुन्हे दाखल करण्यात आले आहेत.
पोलीस आयुक्त अमितेश कुमार यांनी अमली पदार्थ मुक्त पुणे ही मोहीम हाती घेतली आहे. पोलीस आयुक्तांच्या आदेशानुसार शहरातील अमली पदार्थ तस्करांविरुद्ध कारवाई करण्यात येत आहे. अमली पदार्थ विरोधी पथकातील पोलीस विमाननगर परिसरात गस्त घालत होते. लोहगाव- वाघोली रस्त्यावर एक जण थांबला असून, तो मेफेड्रोन विक्री करण्याच्या तयारीत असल्याची माहिती पोलिसांना मिळाली. त्यानुसार पोलिसांनी सापळा लावून कुमेल महंमद तांबोळी (28, रा. धानोरी) याला ताब्यात घेतले. त्याची झडती घेतली असता त्याच्याकडून 19 लाख 17 हजार 300 रुपयांचे 83 ग्रॅम मेफेड्रोन जप्त करण्यात आले. त्याच्याविरुद्ध विमानतळ पोलीस ठाण्यात गु्न्हा दाखल करण्यात आला आहे.
तसेच, मार्केट यार्ड भागात गांजा विक्री प्रकरणात सैफन उर्फ शफिक इस्माइल शेख (52, रा. आनंदनगर) याला अटक करण्यात आली. त्याच्याकडून सात हजार रुपयांचा गांजा जप्त करण्यात आला. सैफन गांजा विक्री करण्याच्या तयारीत असल्याची माहिती पोलिसांना मिळाली होती. पोलिसांच्या पथकाने सापळा लावून त्याला पकडले. तर, विमाननगर भागात मेफेड्रोन विक्री प्रकरणात किरण भाऊसाहेब तुजारे (वय 24, रा. आव्हाळवाडी, वाघोली) याला अटक करण्यात आली असून त्याच्याकडून सहा लाख 27 हजार रुपयांचे 30 ग्रॅम मेफेड्रोन जप्त करण्यात आले. तुजारे मेफेड्रोन विक्री करत असल्याच्या माहितीनुसार कारवाई करुन त्यालादेखील ताब्यात घेण्यात आले.