Gold Theft: प्रवासादरम्यान लाखोंचा ऐवज लंपास

। पनवेल । प्रतिनिधी ।

एसटी बस आणि रिक्षाने प्रवास करणार्‍या 55 वर्षीय व्यक्तीच्या बॅगेतून अज्ञात चोरट्याने 7 लाख 66 हजार रुपये किंमतीचे सोन्याचे दागिने, रोख रक्कम आणि महत्त्वाची कागदपत्रे चोरुन नेल्याची घटना उघडकीस आली आहे. याप्रकरणी तळोजा पोलीस ठाण्यात अज्ञात चोरट्याविरुध्द गुन्हा दाखल करण्यात आला असून, पोलीस तपास सुरु आहे.

मिळालेल्या माहितीनुसार, या प्रकरणातील तक्रारदार निवास कदम (55) सातारा जिल्ह्यातील कोरेगाव तालुक्यात आझादपूर येथे राहण्यास असून, ते एसटी बसने सातारा येथून पनवेल येथे येण्यासाठी निघाले होते. सायंकाळी पनवेल येथे एसटी बस मधून उतरल्यानंतर रिक्षाने ते तळोजा नावडे फेज-2 मधील श्री गणेश सोसायटीतील घरी पोहोचले. त्यानंतर त्यांनी आपली बॅग तपासली असता, त्यांच्या बॅगेतील 4 तोळे वजनाची सोन्याची गंठण, दीड तोळ्याची सोन्याची छोटी गंठण, कानात घालण्याचे सोन्याचे टॉप्स आणि सोन्याची फुले, डायमंडचे टॉप्स आणि अडीच तोळ्याची सोन्याची चेन तसेच 51 हजाराची रोख रक्कम तसेच निवास कदम आणि त्यांच्या पत्नीचे पॅनकार्ड आणि इतर मूळ कागदपत्रे असा एकूण 7 लाख 66 हजार रुपये किमतीचा ऐवज चोरीला गेल्याचे त्यांच्या निदर्शनास आले. एसटी आणि रिक्षा प्रवासादरम्यान अज्ञात चोरट्याने गर्दीचा अथवा इतर परिस्थितीचा फायदा घेऊन त्यांच्या बॅगेतील दागिने आणि रोख रक्कम चोरुन नेल्याचे निवास कदम यांच्या लक्षात आले. त्यानंतर त्यांनी तळोजा पोलीस ठाण्यात धाव घेऊन तक्रार दाखल केली. त्यानुसार पोलिसांनी अज्ञात चोरट्याविरुद्ध गुन्हा दाखल केला आहे. तसेच परिसरातील सीसीटीव्ही फुटेज आणि इतर तांत्रिक बाबींच्या आधारे अज्ञात चोरट्याचा शोध सुरु केला आहे.