हॉटेल व्यावसायिकांवर पोलिसांची करडी नजर

नियम मोडणाऱ्यांवर कठोर कारवाईचा इशारा
किल्ले रायगड हॉटेल व्यावसायिकांसोबत बैठक

| महाड | प्रतिनिधी |

छत्रपती शिवाजी महाराजांच्या राजधानी रायगडाला वर्षभर देश-विदेशातून हजारो पर्यटक, इतिहासप्रेमी आणि शिवभक्त भेट देत असतात. या ऐतिहासिक आणि राष्ट्रीय अस्मितेच्या पवित्र भूमीची सुरक्षितता, पर्यटकांचा विश्वास आणि कायदा-सुव्यवस्था अधिक सक्षम करण्याच्या उद्देशाने पाचाड येथे रायगड परिसरातील सर्व हॉटेल व लॉजिंग व्यावसायिकांची महत्त्वपूर्ण बैठक पार पडली.

महाड पोलीस ठाण्याचे नवनियुक्त पोलीस निरीक्षक अभिजित नवसे यांच्या अध्यक्षतेखाली झालेल्या या बैठकीस रायगड व्यावसायिक संघटनेचे सुमारे 40 हॉटेल व लॉजिंग व्यावसायिक उपस्थित होते. बैठकीत कायद्याचे पालन, पर्यटकांची सुरक्षा, गुन्हेगारीला प्रतिबंध आणि जबाबदार पर्यटन संस्कृती निर्माण करण्यावर विशेष भर देण्यात आला.

पोलीस निरीक्षक नवसे यांनी स्पष्ट शब्दांत सांगितले की, रायगड ही केवळ पर्यटनस्थळ नाही, तर महाराष्ट्राच्या स्वाभिमानाचे आणि इतिहासाचे प्रतीक आहे. त्यामुळे येथे कोणत्याही प्रकारच्या बेकायदेशीर किंवा संशयास्पद हालचालींना अजिबात थारा दिला जाणार नाही. नियमांचे उल्लंघन करणाऱ्यांवर कठोर कायदेशीर कारवाई केली जाईल. प्रत्येक हॉटेल व लॉजमध्ये येत्या 15 दिवसांत उच्च प्रतीचे व कार्यरत सीसीटीव्ही कॅमेरे बसविणे बंधनकारक करण्यात आले आहे. प्रवेशद्वार, रिसेप्शन, पार्किंग व इतर महत्त्वाच्या ठिकाणांवर देखरेख असणे आवश्यक असून, आदेशाचे पालन न करणाऱ्यांवर कायदेशीर कारवाई केली जाणार आहे. एफएसएसएआय परवान्यासह शासनाने आवश्यक केलेले सर्व वैध परवाने अद्ययावत ठेवण्याच्या सूचना देण्यात आल्या.

तपासणीदरम्यान त्रुटी आढळल्यास संबंधितांवर कारवाई करण्यात येईल. हॉटेलमध्ये मुक्काम करणाऱ्या प्रत्येक पाहुण्याची संपूर्ण माहिती रजिस्टरमध्ये नियमित नोंदविणे आणि ती आवश्यकतेनुसार पोलिसांना उपलब्ध करून देणे बंधनकारक असल्याचे स्पष्ट करण्यात आले. प्रत्येक पाहुण्याकडून वैध ओळखपत्र घेणे सक्तीचे करण्यात आले असून, ओळख न पडताळता कोणालाही रूम देऊ नये, असे निर्देश देण्यात आले.

हॉटेल किंवा लॉजचा वापर देहविक्री, वेश्याव्यवसाय, अमली पदार्थांचा व्यवहार किंवा इतर कोणत्याही गुन्हेगारी कृत्यासाठी होत असल्याचे आढळल्यास संबंधित मालक, व्यवस्थापक व जबाबदार व्यक्तींवर कठोर कायदेशीर कारवाई करण्यात येईल, असा स्पष्ट इशारा देण्यात आला.

यावेळी किल्ले रायगड हॉटेल व्यवसाय संघटनेचे अध्यक्ष रघुवीर देशमुख यांनी संघटनेमार्फत गेल्या वर्षभरात राबविण्यात आलेल्या विविध उपक्रमांची माहिती दिली. पर्यटकांच्या हॉटेलमध्ये राहिलेल्या मौल्यवान वस्तू प्रामाणिकपणे परत करणे, अन्न व औषध प्रशासनाच्या सहकार्याने मार्गदर्शन शिबिरांचे आयोजन करणे, आपत्कालीन प्रसंगी पोलीस घटनास्थळी पोहोचण्यापूर्वी जखमींना तातडीने रुग्णालयात पोहोचविण्यासाठी मदत करणे, अशा जबाबदाऱ्या संघटनेतील सर्व सदस्य सातत्याने पार पाडत असल्याचे त्यांनी सांगितले. या बैठकीस राजेंद्र खातू, तानाजी अवकीरकर, अनंत देशमुख, लहू अवकीरकर, जयेश लामजे, पोलीस पाटील गणेश डावले आदी उपस्थित होते.