लोकसभा निवडणुकीमुळे आयपीएल देशाबाहेर

| नवी दिल्ली | वृत्तसंस्था |

बीसीसीआय आयपीएल 2024 लवकर घेण्याच्या तयारीत आहे. तसंच आयपीएल 2024 विदेशात होण्याचीही शक्यता आहे. आगामी लोकसभा निवडणुकीमुळे आयपीएलमध्ये हे बदल अपेक्षित आहेत. बीसीसीआयच्या सूत्रांनी दिलेल्या माहितीनुसार, पुढील वर्षी लोकसभा निवडणूक होणार असून यानिमित्ताने आ़यपीएल 2024 लवकर खेळली जाण्याची शक्यता आहे. आम्हाला निवडणुकांची कल्पना असून, योजना आखताना आम्ही त्याचाही विचार करत आहोत. गरज पडल्यास आयपीएल पुढील वर्षी मार्च महिन्यातच खेळवली जाऊ शकते. तसंच मे महिन्याच्या मध्यात अंतिम सामना खेळवत स्पर्धा संपवण्याचा प्रयत्न असेल. दरम्यान, सध्या बीसीसीआयचं संपूर्ण लक्ष आगामी वर्ल्डकप 2023 वर आहे. आयपीएलसाठी अद्याप फार वेळ आहे. त्यामुळे आगामी काळातील घडामोडींवर अनेक गोष्टी अवलंबून असतील.

परदेशात खेळवली जाऊ शकते स्पर्धा
परदेशात आयपीएल खेळवण्यासंबंधी बीबीसीआयच्या सूत्रांनी सांगितलं आहे की, आम्ही याआधीही निवडणूक आणि स्पर्धा एकत्र आल्याने व्यवस्थितपणे संतुलन साधलं आहे. गरज पडल्यास आयपीएल 2024 विदेशातही खेळवू शकतो. पण आमची प्राथमिकता आयपीएल भारतातच व्हावी यासाठी असणार आहे. परिस्थिती पाहून निर्णय घेतला जाईल. पण अद्याप फार वेळ शिल्लक असल्याने जास्त काही बोलणं किंवा अंदाज लावणं योग्य ठरणार नाही.

आतापर्यंत दोन वेळा लोकसभा निवडणुकीमुळे आयपीएल भारताबाहेर खेळवण्यात आली आहे. 2009 लोकसभा निवडणुकीमुळे आयपीएल स्पर्धा दक्षिण आफ्रिकेत पार पडली होती. यानंतर 2014 लोकसभा निवडणुकीमुळे आयपीएलचं दोन भागात विभाजन करण्यात आलं होतं. अर्धी स्पर्धा भारतात पार पडली होती, तर उर्वरित स्पर्धा युएईमध्ये झाली होती.