जिल्ह्यातील 21 ठिकाणी कार्यक्रमांचे आयोजन
। अलिबाग । वार्ताहर ।
महाराष्ट्र शासनाच्या माहिती व जनसंपर्क महासंचालनालय, जिल्हा माहिती कार्यालय, रायगड-अलिबाग व प्रिझम सामाजिक विकास संस्था यांच्याद्वारे जिल्हा पुरवठा अधिकारी मधुकर बोडके यांच्या प्रमुख उपस्थितीत लोक कल्याणकारी योजनांचा जागर संपन्न झाला.
यावेळी उपस्थित पर्यटकांना, स्थानिक नागरिकांना विविध शासकीय योजनांची, राज्य शासनाने जिल्ह्यासाठी घेतलेल्या विविध विकासात्मक निर्णयांची, जिल्हा प्रशासनाकडून राबविण्यात येणार्या विविध उपक्रमांची माहिती देण्यात आली. त्याचबरोबर राज्यातील ग्रामीण जनतेस शुद्ध व पुरेसे पिण्याचे पाणी उपलब्ध करून देण्याच्या दृष्टीने राज्यात मुख्यमंत्री ग्रामीण पेयजल कार्यक्रम, विमुक्त जाती, भटक्या जमाती, विशेष मागास प्रवर्ग आणि इतर मागास प्रवर्गातील लाभार्थी करिता क्रांतीज्योती सावित्रीबाई फुले घरकुल योजना, पीक कर्जाची वेळेत परतफेड करणार्या शेतकर्यांसाठी तीन लाखापर्यंतचे कर्ज बिनव्याजी देण्याची योजनाची माहिती यावेळी पथनाट्यातून देण्यात आली. तसेच अतिवृष्टी व नैसर्गिक आपत्तीच्या काळात आपले शासन शेतकर्यांच्या पाठीशी खंबीरपणे उभे राहून निधी मंजूर केला. महात्मा ज्योतिराव फुले शेतकरी कर्ज मुक्ती योजना 2019 ची यशस्वी अंमलबजावणी केली. पालकमंत्री अदिती तटकरे यांच्या प्रयत्नातून जिल्ह्यात उसर येथे शासकीय वैद्यकीय महाविद्यालय व 500 खाटांचे रुग्णालय सुरू होण्याविषयी, जिल्ह्यात माणगाव येथील स्वतंत्र 100 खाटांचे स्त्री रुग्णालय, वडखळ येथे ट्रॉमा केअर सेंटर, किहीम येथे डॉ. सलीम अली पक्षी अभ्यास केंद्र कर्नाळा व फणसाड अभयारण्याचा विकास, जिल्हाधिकारी डॉ. महेंद्र कल्याणकर यांच्या मार्गदर्शनाखाली जिल्हा प्रशासनाकडून राबविण्यात येणारे स्पर्धा परीक्षेचा अभ्यास करणार्या जिल्ह्यातील युवक-युवतींसाठी गरुडझेप स्पर्धा परीक्षा केंद्र, कातकरी उत्थान अभियान, माझी वसुंधरा यासारख्या अभियानांची आणि अशा अनेक शासकीय योजनांची, उपक्रमांची माहिती यावेळी पथनाट्यातून उपस्थितांना देण्यात आली. या पथनाट्याचे नेतृत्व तपस्वी नंदकुमार गोंधळी या प्रिझम संस्थेच्या अध्यक्षा करीत असून या पथनाट्यात दहा कलाकार सहभागी झाले होते. या पथनाट्याद्वारे जिल्ह्यातील 21 ठिकाणी दोन वर्षे जनसेवेचीजनजागृती करण्यात येत असल्याचे तपस्वी गोंधळी यांनी सांगितले.