कोमसापचे वाङमयीन पुरस्कार जाहीर

। ठाणे । प्रतिनिधी ।
कोमसाप तर्फे वाङमयीन तसेच वाङमयेतर क्षेत्रातील योगदानासाठी दिल्या जाणार्‍या विविध पुरस्कारांच्या मानकर्‍यांची घोषणा करण्यात आली. कोमसापकडून गेल्या तीन वर्षांतील 74 जणांची पुरस्कारासाठी निवड करण्यात आली असून पालघर येथे होणार्‍या सहाव्या राज्यस्तरीय महिला साहित्य संमेलनात वितरण होणार आहे.

बैठकीसकोमसापच्या केंद्रीय अध्यक्ष नमिता कीर, कोमसापचे केंद्रीय कार्याध्यक्ष प्रा. डॉ. प्रदीप ढवळ आणि पालघर येथे होणार्‍या महिला साहित्य संमेलनाच्या स्वागताध्यक्ष ज्योती ठाकरे इत्यादी उपस्थित होते. कोमसापकडून गेल्या 25 वर्षांपासून वाङ्मयीन आणि वाङ्मयेतर क्षेत्रातील योगदानासाठी दरवर्षी विविध पुरस्कार दिले जातात; परंतु कोरोनाकाळातील निर्बंधांमुळे गेल्या दोन वर्षांत या पुरस्कारांचे वितरण शक्य झाले नाही. त्यामुळे निर्बंधांच्या शिथिलतेनंतर आता गेल्या तीन वर्षांतील पुरस्कारांसाठी घोषणा करण्यात आली आहे. यात कादंबरी, कथा, कविता, चरित्रपर, ललित, समीक्षा, वैचारिक, बालवाङ्मय आदी साहित्यप्रकारांतील उल्लेखनीय साहित्यकृतींद्वारे, तसेच वाङ्मयीन व्यवहार, पर्यावरण, शिक्षण आदी क्षेत्रांत कृतिशील योगदान देणार्‍या तब्बल 74 जणांचा पुरस्कारासाठी समावेश आहे. प्रा. अशोक ठाकूर यांच्या अध्यक्षतेखालील समितीने या पुरस्कारांसाठी निवड केली आहे.

पालघरला संमेलन
कोमसापने 11 व 12 जून 2022 रोजी पालघर येथे प्रसिद्ध लेखिका-संपादक मोनिका गजेंद्रगडकर यांच्या अध्यक्षतेखाली सहावे राज्यस्तरीय महिला साहित्य संमेलन आयोजित केले आहे. या संमेलनाच्या उद्घाटन समारंभास विधान परिषदेच्या उपसभापती नीलम गोर्‍हे या उपस्थित राहणार असून राज्य महिला आर्थिक विकास महामंडळाच्या अध्यक्ष ज्योतीताई ठाकरे या संमेलनाचे स्वागताध्यक्षपद भूषविणार आहेत. खासदार सुप्रिया सुळे, प्रसिद्ध अभिनेत्री निशिगंधा वाड आणि ज्येष्ठ कवयित्री-लेखिका नीरजा या पुरस्कार वितरण सोहळ्याच्या विशेष अतिथी म्हणून उपस्थिती लावणार आहेत.

वाङ्मयीन पुरस्कार
(1) र. वा. दिघे स्मृती पुरस्कार : चित्रा अविनाश नानिवडेकर (कादंबरी- अंतरीच्या गुढगर्भी) (2) वि. सी. गुर्जर स्मृती पुरस्कार : विलास गावडे (कथासंग्रह- अनुभवाची शिदोरी) वाङ्मयेतर पुरस्कार-(1) गुरुवर्य अ. आ. देसाई स्मृती कोमसाप कार्यकर्ता पुरस्कार : मंदार टिल्लू, ठाणे,(2) राजा राजवाडे स्मृती वाङ्मयीन कार्यकर्ती पुरस्कार : वृंदा कांबळी, वेंगुर्ले

कोमसाप पुरस्कार : सन 2020-2021
वाङ्मयीन पुरस्कार-(1) र. वा. दिघे स्मृती पुरस्कार : अविनाश बापट (कादंबरी- खालाटी वलाटी),2) वि. सी. गुर्जर स्मृती पुरस्कार : संपदा पाटगावकर (कथासंग्रह- तर्पण)

वाङ्मयेतर पुरस्कार
(1) वामनराव दाते स्मृती उत्कृष्ट कोमसाप शाखा पुरस्कार : कोमसाप दादर शाखा, मुंबई,(2) सौ. नमिता कीर लक्षवेधी पुरस्कार (ग्रामीण भागातील स्त्री-लेखकासाठी) : वृषाली मगदूम, नेरूळ