मधमाशांच्या हल्ल्यात एकाचा मृत्यू

एकजण गंभीर; कर्नाळा पक्षी अभयारण्यातील घटना

| पनवेल | विशेष प्रतिनिधी |

तालुक्यातील कर्नाळा पक्षी अभयारण्यात पर्यटनासाठी आलेल्या पर्यटकांवर मधमाशांनी हल्ला केल्याची घटना शनिवारी (दि. 15) घडली आहे. हल्ल्यात गंभीर जखमी झालेल्या एका पर्यटकाचा मृत्यू झाल्याची माहिती कर्नाळा पक्षी अभयारण्याचे वनशेत्रपाल नारायण राठोड यांनी दिली असून, संदीप पुरोहित (रा.कोपरखैरणे) असे मृत्यू झालेल्या इसमाचे नाव आहे.

मधमाशांनी केलेल्या हल्ल्यानंतर झालेल्या पळापळीत पडून पुरोहित यांचा मृत्यू झाल्याची शक्यता प्रत्यक्षदर्शिनी वर्तवली आहे. तर, इतर जखमींवर पनवेलमधील उपजिल्हा रुग्णालयात उपचार सुरु असून, उपजिल्हा रुग्णालयात दाखल एका पर्यटकाची प्रकृती गंभीर असल्याची माहिती देण्यात आली आहे. तर, काही पर्यटकांना नजीकच्या खासगी रुग्णालयात उपचारासाठी दाखल करण्यात आले आहे. मिळालेल्या माहितीनुसार, मुंबई तसेच नवी मुंबई येथून पर्यटनासाठी आलेल्या काही पर्यटकांवर मधमाशांनी हल्ला चढविला. हे सर्व पर्यटक मिळून कर्नाळा किल्ल्याकडे चालत जात होते. अभयारण्यातून वाट काढताना अचानक मधमाशांच्या थव्याने या पर्यटकांवर हल्ला चढवला. मधमाशांचा थवा मोठा असल्याने पर्यटक स्वतःला वाचवण्यासाठी पळापळ करू लागले. यावेळी या पर्यटकांमध्ये एक पर्यटक बेशुद्ध झाला. त्याला इतर पर्यटक आणि वन कर्मचार्‍यांनी जवळील रूग्णालयात दाखल केले. बेशुद्ध अवस्थेत आलेल्या दोन पर्यटकांना जवळच्या रूग्णालयात दाखल केले.

जुन्या मुंबई-पुणे महमार्गावर असलेले कर्नाळा पक्षी अभयारण्य पर्यटकांचे आवडते ठिकाण असून, या ठिकाणी शनिवारी, रविवारी मोठ्या प्रमाणात पर्यटक येत असतात. शनिवारीदेखील माटुंगा येथील व्हीजेटीआय येथील कॉलेजची सहा मुले ट्रेकिंगसाठी किल्ल्यावरती आली असता त्यांच्यावर मधमाशांनी हल्ला केला. यात कॉलेजमधील रुद्र साहू, अनिश आणि अंश वाघ या तिघांचा समावेश आहे.

निसर्ग मित्र संस्था पनवेलचे सदस्य मदतीला
सकाळी 11 च्या सुमारास घडलेल्या घटनेची माहिती मिळताच निसर्ग मित्र संस्था पनवेलचे सदस्य मदतीसाठी घटनास्थळी दाखल झाले होते. वनकर्मचारी आणि अधिकार्‍यांच्या मदतीने जखमी झालेल्या काही पर्यटकांना खांद्यावर तसेच, स्ट्रेचरच्या सहाय्याने खाली आणल्याची माहिती संस्थेचे सदस्य पराग सरोदे यांनी दिली आहे.