कृषी महोत्सवात सहभागी व्हा – प्रदीप नाईक

| रेवदंडा | वार्ताहर |
आवास येथील राज्यस्तरीय कृषी महोत्सवात मोठ्या संख्येने सहभागी होण्याचे आवाहन चौल पाठारे क्षत्रिय समाज सभागृहात उपस्थित शेतकरी व बागायतदारांना मार्गदर्शन करताना प्रदीप नाईक व क्षात्रैक्य समाज तालुका अध्यक्ष अविनाश राऊळ यांनी केले.

चौल पाठारे क्षत्रिय समाज सभागृहात सोमवार, दि. 27 जून रोजी सायंकाळी सहा वाजता चौल पंचक्रोशीतील शेतकरी व बागायतदारांची क्षात्रैक्य समाजाच्या वतीने 6, 7, 8 व 9 जानेवारी 2023 मध्ये राज्यस्तरीय कृषी महोत्सवाच्या पूर्वतयारी हेतूने सभेचे आयोजन करण्यात आले होते. यावेळी क्षात्रेक्य समाजाचे अध्यक्ष अविनाश राऊळ, सचिव प्रदीप नाईक, चौल पाचकळशी समाज अध्यक्ष सुरेश घरत (कोटकर), आगरी समाज व कामगार नेते अनंत गोंधळी, भंडारी समाज कार्यकर्ते भास्कर चव्हाण, अशोक अंबूकर, सदानंद पडते, श्रीनाथ कवळे, मनोज राऊळ, रवींद्र वर्तक, अनंत घरत, नरेश म्हात्रे, अतुल वर्तक, सदानंद ठाकूर, आर.डी. नाईक, उदय नाईक, सुनील नाईक, संतोष घरत, दिलीप राऊत आदी मान्यवरांसह चौल पाचकळशी समाज बांधव यांची उपस्थिती होती. सभेचे आयोजन चौल पाचकळशी समाज अध्यक्ष सुरेश घरत (कोटकर) यांनी केले होते.

दरम्यान, राज्यस्तरीय कृषी महोत्सवात विविधता पहावयास मिळणार असून, यामध्ये राज्यस्तरीय कृस्ती, कबड्डी, बैलगाडी, मल्लखांब स्पर्धेचे नियोजन करण्यात येणार असून, शेतकर्‍याने उत्पादित केलेल्या मालाचे विविध स्टॉल पहावयास मिळतील, तसेच शेतीमाल विक्रीच्या दृष्टीने कृषी तज्ज्ञांच्या मार्गदर्शनाचा लाभ मिळणार आहे, असे क्षात्रैक्य समाज सचिव प्रदीप नाईक यांनी सांगितले. यावेळी उपस्थितांचे आभार अतुल वर्तक यांनी, तर सूत्रसंचालन चौल पाचकळशी समाज अध्यक्ष सुरेश घरत यांनी केले.