ओडिसामध्ये रेल्वेचा भीषण अपघात

| नवी दिल्ली | वृत्तसंस्था |

ओडिशामध्ये पुन्हा एकदा मोठा रेल्वे अपघात झाला आहे. दिल्ली आणि आसाम दरम्यान धावणाऱ्या कामाख्या एक्सप्रेसचे 11 एसी डबे रुळावरून घसरले. ईस्ट कोस्ट रेल्वेच्या खुर्दा विभागात ही घटना घडली. सुदैवाने या अपघातात कोणतीही जिवीतहानी झालेली नाही तर प्रवासी जखमी झाले नाहीत.

रेल्वे अधिकाऱ्यांनी अपघाताची पुष्टी केली आणि माहिती देताना सांगितले की, आज रविवारी (दि.30) सकाळी 11:54 वाजता ईस्ट कोस्ट रेल्वेच्या खुर्दा रोड विभागातील कटक-नारागुंडी रेल्वे विभागात ही घटना घडली. एसएमव्हीटी बेंगळुरू-कामाख्या एसी सुपरफास्ट एक्स्प्रेस बेंगळुरूहून गुवाहाटीच्या दिशेने जात असताना हा अपघात झाला. घटनेची माहिती मिळताच रेल्वेचे पथक घटनास्थळी पोहोचले आणि त्यांनी मदत आणि बचावकार्य सुरू केले. अपघातग्रस्त रिलीफ ट्रेन आणि मेडिकल रिलीफ ट्रेनही तातडीने घटनास्थळी रवाना करण्यात आली. रेल्वे अधिकाऱ्यांनी दिलेल्या माहितीनुसार, अपघाताचे कारण अद्याप समजू शकलेले नाही. रेल्वेने प्रवासी आणि त्यांच्या कुटुंबीयांसाठी एक हेल्पलाइन क्रमांक – 8991124238 जारी केला आहे.