विद्यार्थी दत्तक पालक योजना जाहीर

शैक्षणिक साहित्यासह मिळणार 11 हजारांपर्यंत मदत

| सुधागड-पाली | प्रतिनिधी |

शिक्षणाची तीव्र इच्छा असूनही केवळ आर्थिक परिस्थितीमुळे कोणत्याही विद्यार्थ्याचे शिक्षण थांबू नये, या उदात्त हेतूने ‘सुधागड तालुका मराठा समाज’ या संस्थेच्या वतीने एक अत्यंत महत्त्वाकांक्षी आणि कौतुकास्पद उपक्रम हाती घेण्यात आला आहे. सर्व जाती-धर्माच्या गरजू, होतकरू व आर्थिकदृष्ट्या दुर्बल असलेल्या विद्यार्थ्यांसाठी संस्थेने ‘विद्यार्थी दत्तक पालक योजना 2026’ जाहीर केली असून, पात्र विद्यार्थ्यांना 7 जून 2026 पर्यंत नोंदणी करण्याचे आवाहन करण्यात आले आहे.

या योजनेच्या माध्यमातून समाजातील दानशूर व्यक्ती गरजू विद्यार्थ्यांचे ‘दत्तक पालक’ म्हणून पुढे येणार आहेत. संस्थेच्या माध्यमातून निवड झालेल्या प्रत्येक विद्यार्थ्याला अंदाजे 9 ते 11 हजार रुपयांपर्यंतची शैक्षणिक मदत दिली जाणार आहे. या योजनेअंतर्गत मिळणारे प्रमुख लाभ म्हणजे वह्या, पुस्तके आणि दोन शालेय गणवेश, दप्तर, छत्री/रेनकोट, चप्पल, शाळा/कॉलेजची परीक्षा फी तसेच स्पर्धा परीक्षा फी, आवश्यकतेनुसार प्रवास खर्च आणि मोबाईल रिचार्ज तसेच गरजेनुसार इतर आवश्यक शैक्षणिक साहित्य विद्यार्थ्यांना मिळणार आहे.

पात्रतेचे निकष
ही योजना फक्त सुधागड तालुक्यातील शाळा किंवा कॉलेजमध्ये शिक्षण घेणाऱ्या इयत्ता 8 वी ते 12 वी पर्यंतच्या सर्व जाती-धर्मांतील विद्यार्थ्यांसाठी लागू राहील. विद्यार्थ्याला मागील शैक्षणिक वर्षात किमान 60 टक्के किंवा त्यापेक्षा जास्त गुण असणे आवश्यक आहे (गुणपत्रिका जोडणे अनिवार्य) पालकांचे एकत्रित वार्षिक उत्पन्न 1,25,000 किंवा त्यापेक्षा कमी असावे. (उत्पन्न दाखला नसल्यास स्वयंघोषणापत्र गरजेचे). पालकांची जमीन 2.5 एकरपेक्षा कमी किंवा ते भूमिहीन असावेत. पात्र विद्यार्थ्याला संस्थेकडून 2 झाडे (रोप) दिली जातील. त्याचे संवर्धन करून दर 3 महिन्यांनी झाडासोबतचा फोटो/सेल्फी संस्थेला पाठवणे बंधनकारक राहील. विद्यार्थ्याची शाळेतील उपस्थिती किमान 75 टक्के असावी आणि दर 3 महिन्यांनी प्रगती अहवाल सादर करावा लागेल.

असा करावा अर्ज 
इच्छुक विद्यार्थ्यांनी 7 जून 2026 पूर्वी दिलेल्या गुगल फॉर्म लिंकवर नोंदणी करावी. त्यानंतर मराठा समाजाच्या पाली येथील मध्यवर्ती कार्यालयातून फॉर्म घेऊन किंवा पीडीएफ प्रिंट काढून सर्व कागदपत्रांसह फॉर्म कार्यालयात जमा करावा. विभागीय अध्यक्षांचे शिफारसपत्र जोडणे आवश्यक आहे. अधिक माहितीसाठी संस्थेच्या शिक्षण तज्ञ समितीतील सदस्य मिलिंद शिंदे 9270217111, नरेश शेडगे 9145564865, शुभदा पाटील 9270089784 यांच्याशी संपर्क साधण्याचे आवाहन संस्थेचे अध्यक्ष धनंजय साजेकर यांनी केले आहे.