कोलाड-रोहा राज्यमार्गावर गुरांचा संचार

वाहन चालक, नागरीक त्रस्त

| गोवे-कोलाड | वार्ताहर |

कोलाड-रोहा राज्य मार्गावर मोकाट जनावरांचा दिवसेंदिवस मोठ्या प्रमाणात त्रास वाढत आहे. या मोकाट भटक्या गुरांनी उच्छाद मांडल्यामुळे मार्गावर ये-जा करणाऱ्यास अडथळा निर्माण होत असून चालकांना तारेवरची कसरत करावी लागते. त्यामुळे नागरीक कमालीचे त्रस्त झाले आहेत. रात्रीच्या सुमारास अंधार तसेच मागील चार दिवस मोठा पाऊस असल्याने वाहन चालकांना गाडी चालविताना मोठी कसरत करावी लागत आहे.

रोहा-कोलाड महामार्गावर बायपास तसेच वरसे, रोठ या ठिकाणी गुरे मोठा प्रमाणात ठिय्या मांडून बसलेले वारंवार आढळून येतात. त्यामुळे मोठ्या प्रमाणात वाहन, वाहतूकदार तसेच प्रवाशी वर्गाला मोठा अडथळा निर्माण होत आहे. या राज्य मार्गावर रोहा, मुरुड, अलिबाग, दिवेअगार, मुंबई, ठाणे शहरांकडे जाण्यासाठी हजारो लहान-मोठी वाहने रात्रं-दिवस ये-जा करत असतात. तर धाटाव या परिसरामध्ये औद्योगिक वसाहती व अनेक कंपन्या सुरू असल्यामुळे कंपनीसाठी लागणारा कच्चामाल नेण्यासाठी जडअवजड वाहने या मार्गावरून धावत असतात. तर रोहा ही सर्वांचीच मुख्य बाजारपेठ असल्याने अनेकजण रोहाकडे प्रवास करत असतात. मात्र या सर्वांना सदरच्या मार्गावर मोकाट गुरांचा मोठा त्रास होत असून मोठा आपघातांचा धोका निर्माण होण्याची शक्यता नाकारता येत नाही. त्यामुळे संबधित परिसरातील ग्राम पंचायत अथवा ग्रामस्थ यांनी यावर उपाय योजना कराव्या अशी मागणी सर्व स्तरांतून केली जात आहे .