एकनाथ शिंदेंचं बंड! सरकार कोसळणार

। मुंबई । प्रतिनिधी ।
शिवसेना आमदारांना घेऊन एकनाथ शिंदे आसामच्या गुवाहटीमध्ये पोहोचले आहेत. त्यांच्यासोबत शिवसेनेचे 33 आमदार आहेत. एकनाथ शिंदे यांनी काल ट्विट करुन मी बाळासाहेब ठाकरे आणि धर्मवीर आनंद दिघे यांचा हिंदुत्वाचा विचार सोडला नसल्याचं म्हटलं आहे. आता आदित्य ठाकरे यांनी मंत्रिपदाचा उल्लेख हटवला आहे. त्यामुळे सरकार कोसळणार असल्याच्या चर्चांना उधाण आले आहे. अशातच एकनाथ शिंदे यांनी त्यांच्या ट्विटरवरुन शिवसेनेचा उल्लेख हटवलेला नाही. त्यामुळे राज्याचे राजकारण कोणत्या दिशेनं जाणार याबाबत अनेक तर्कवितर्क काढण्यात येत आहेत.

विधानपरिषदेच्या निवडणुकीच्या निकालाच्या रात्रीच शिवसेनेचे बंडखोर नेते एकनाथ शिंदे यांनी काही आमदारांसह सूरत गाठलं आणि थेट बंड पुकारलं. 24 तास चाललेल्या राजकीय नाट्यानंतर सध्या शिवसेना खिळखिळी झाल्याचं चित्र आहे. विरोधकांवर नेहमी तोफ डागणारे संजय राऊतांचा सूरही आज जरा मावळलेला दिसला. सध्या सुरु असलेल्या राजकीय घडामोडींमुळे जास्तीत जास्त काय होईल, आमची सत्ता जाईल, असं ते म्हणाले. तर, संजय राऊतांच्या वक्तव्याच्या काहीच क्षणात पर्यावरण मंत्री आदित्य ठाकरे यांनी आपल्या ट्विटरवरुन मंत्रिपदाचा उल्लेख हटवला आहे. आदित्य ठाकरे यांनी ट्विटरवरुन बायो हटवल्यानंतर आता सरकार कोसळणार असल्याच्या चर्चेने जोर धरला आहे.

जास्तीत जास्त काय होईल, आमची सत्ता जाईल – संजय राऊत
सध्या सुरु असलेल्या राजकीय घडामोडींमुळे जास्तीत जास्त काय होईल, आमची सत्ता जाईल ना? सत्ताही परत मिळवता येईल. पण पक्षाची प्रतिष्ठा ही आमच्यासाठी सर्वोच्च आहे. एकनाथ शिंदे हे सध्या आमच्यापासून लांब आहेत, ते जवळ आल्यावर आम्ही त्यांच्याशी बोलू. एकनाथ शिंदे हे माझे फक्त सहकारी नव्हेत तर मित्रही आहेत. आम्ही गेली 35-40 वर्षे एकत्र काम करतोय. उद्धव ठाकरे यांच्याशीही त्यांचे असेच नाते आहे. एकनाथ शिंदे यांच्यासोबतचे आमदार प्रथम सूरत आणि आता गुवाहाटीमध्ये गेले आहेत. आमदारांनी पर्यटन करणे ही चांगली गोष्ट आहे. पण ते परत येतील, असा विश्‍वासही संजय राऊत यांनी व्यक्त केला.